Навіны рэспублікі
29 студзеня 2020
Бюджэт пражытачнага мінімуму з 1 лютага складзе Br239,87
Мінск /Кар. БЕЛТА/. Новы памер бюджэту пражытачнага мінімуму ў сярэднім на душу насельніцтва і па асноўных сацыяльна-дэмаграфічных групах зацверджаны пастановай Міністэрства працы і сацыяльнай абароны ад 22 студзеня 2020 года нумар 6, паведамілі БЕЛТА ў Мінпрацы і сацабароны.
З 1 лістапада 2019 года бюджэт пражытачнага мінімуму ў Беларусі складаў Br231,83. З 1 лютага ён вырасце да Br239,87 (рост на 3,5 працэнта) і будзе дзейнічаць па 30 красавіка 2020 года. Для розных груп насельніцтва сума будзе розная. Для працаздольнага насельніцтва бюджэт пражытачнага мінімуму складзе Br265,91, пенсіянераў - Br184,2, студэнтаў - Br232,83, дзяцей ва ўзросце да 3 гадоў - Br155,64, дзяцей ад 3 да 6 гадоў - Br212,79, дзяцей ад 6 да 18 гадоў - Br260,48.
Павелічэнне бюджэту пражытачнага мінімуму звязана ў першую чаргу са змяненнем яго структуры (рост на 3,3 працэнта), за кошт росту цэн на тавары і паслугі БПМ у сярэднім на душу насельніцтва павялічыўся на 0,2 працэнта.
Разам з бюджэтам пражытачнага мінімуму павялічацца і мінімальныя працоўныя і сацыяльныя пенсіі, надбаўкі і павышэнні асобным катэгорыям пенсіянераў. Вырастуць даплаты для асоб ва ўзросце 75 гадоў і старэйшым, якія атрымліваюць пенсіі ў органах па працы, занятасцi i сацыяльнай абароне. Больш стануць дапамогі па доглядзе інваліда першай групы або чалавека, які дасягнуў 80-гадовага ўзросту, вырастуць дзярждапамогі на дзяцей. Гэтыя выплаты павялічваюцца адпаведна з ростам БПМ - на 3,5 працэнта.
Бюджэт пражытачнага мінімуму як сацыяльны нарматыў прызначаецца для аналізу і прагназавання ўзроўню жыцця насельніцтва, аказання дзяржаўнай сацыяльнай дапамогі малазабяспечаным грамадзянам (сем'ям), абгрунтавання мінімальных дзяржаўных сацыяльна-працоўных гарантый.-0-
