21 ліпеня 2020
Фотавыстаўка ў Гомелі знаёміць з укладам і традыцыямі Малдовы
Гомель /Кар. БЕЛТА/. Выстаўка "Малдова. Краіна і людзі" дэманструецца ў Музеі гісторыі друку і фатаграфіі Гомельшчыны, паведамілі БЕЛТА ва ўстанове.
У экспазіцыю ўвайшлі каля 30 работ фатографа Дана Гуцу з Кішынёва. "Гэта своеасаблівая спроба зазірнуць углыб побыту і жыцця простых людзей, паказаць прыроду краіны. Работы, прадстаўленыя на выстаўцы, створаны ў асноўным у сельскай мясцовасці", - расказалі ў музеі.
Паводле слоў арганізатараў, большасць людзей пазнаюць краіну па таварах, брэндах або паслугах, якія яна пастаўляе на сусветныя рынкі. Гэта, з аднаго боку, фарміруе яе вобраз, а з другога - стварае стэрэатыпы і імідж краіны. Малдова ўваходзіць у склад 7 працэнтаў зямной сушы, дзе расце грэцкі арэх, які выкарыстоўваюць у выпуску швейцарскага або нямецкага шакаладу. Адна з візітных картак Малдовы - віно. Дынамічна развіваецца такі напрамак малдаўскай эканомікі, як IT-індустрыя.
Пры гэтым характэрнай рысай Малдовы з'яўляецца яе этнічная разнастайнасць. "Дзве трэці насельніцтва маюць румынскае паходжанне. Вызначэнне этнічных груп застаецца прадметам спрэчкі. За шмат стагоддзяў малдаване змаглі сфарміраваць свае звычаі. Дзіўна, што большасць з іх маляўнічыя і яркія, быццам жыццё гэтага народа цалкам складаецца са свят. Народ, які ўмее з усмешкай успрымаць любыя цяжкасці, заслугоўвае шчырай павагі. Гэта адлюстравана і ў работах таленавітага фатографа", - адзначылі арганізатары выстаўкі.
Дан Гуцу нарадзіўся і вырас у Кішынёве. Пачаў фатаграфаваць у 17 гадоў. Скончыў Акадэмію мастацтваў па спецыяльнасці рэжысёр кіно, тэлебачання і тэатра, пазней атрымаў спецыяльнасць рэжысёра анімацыйнага кіно. Доўгі час працаваў у прэсе, потым пачаў здымаць асабістыя дакументальныя праекты. Яго персанальныя выстаўкі прайшлі ў Польшчы і Малдове.
Азнаёміцца з работамі фатографа можна будзе да 29 жніўня.
Арганізатары выстаўкі - Музей гісторыі горада Гомеля, скульптар Аляксей Відраска, фатограф Дан Гуцу.-0-