Моўная версія ў стадыі напаўнення
Адрас: 247802, г.Нароўля,
вул. Камуністычная, 3
Е-mail: isp@narovlya.gov.by
Тэлефон: (+375 2355) 2-12-10
Тэлефон-факс: (+375 2355) 2 13 21
Мастак Дзмітрый Семітка перадаў у дар Нараўлянскаму гісторыка-этнаграфічнаму музею дзве карціны: аўтарскую «Вольга» і свайго бацькі Уладзіміра Семітка «Сцяжынка».
Мастакі жывуць у Мінску. Для іх Нараўляншчына не чужая. Тут Уладзімір Іванавіч працаваў намеснікам галоўнага ўрача і дзіцячым хірургам цэнтральнай раённай бальніцы, а гады дзяцінства і юнацтва Дзмітрыя Уладзіміравіча прайшлі ў нашым горадзе. Як жа медык і ваенны сталі пісаць карціны? Уладзімір Семітка браў урокі выяўленчага мастацтва ў Нароўлі ў выкладчыка Юрыя Туканава. Дзмітрый Уладзіміравіч вучыўся мастацтву ў бацькі. Задаткі да малявання маюцца ў дачкі і ўнучкі сям'і Семіткі Вольгі.
– Для мяне вялікі гонар падарыць Нараўляншчыне нашы з бацькам працы, — прызнаўся Дзмітрый Семітка. – Мае карціны знаходзяцца па ўсім свеце. Прыйшоў час, калі ў мяне з'явілася жаданне аддаць нешта ў дар сваёй малой радзіме, якая мяне да сябе прыцягвае унікальнай прыродай.
Дырэктар музея Раіса Бобр лічыць сімвалічным, што ў Год міру і стварэння ўстанове культуры быў зроблены такі значны і дарагі падарунак.
– Задача музея-сабраць звесткі пра тых людзей, якія тут жылі і ўнеслі важкі ўклад у папулярызацыю нашага рэгіёна. Важна склеіць аскепкі, якія пакінула катастрофа на Чарнобыльскай АЭС, бо сучаснасці не можа быць без мінулага, — упэўненая Раіса Баляславаўна.
Дарэчы, падчас гутаркі з мастаком высветлілася, што яго дзядуля Іван Семітка да Вялікай Айчыннай вайны ў Нароўлі займаў высокую кіруючую пасаду.
Сустрэча з Дзмітрыем Семітка, які з'яўляецца пастаянным удзельнікам сталічнай выставы-кірмашу «Чароўны млын», пакінула незабыўныя ўражанні, а карціны нашых таленавітых землякоў зоймуць годнае месца ў нашым музеі. Тут імі змогуць палюбавацца ўсе жадаючыя жыхары Нараўляншчыны.
Крыніца: https://narovlya.by/novosti/kultura/kartiny-v-dar-narovlyanskomu-muzeyu/