Прадухіліць экстрэмізм. У Нароўлі прайшла каардынацыйная нарада па барацьбе са злачыннасцю
Экстрэмізм з'яўляецца рэальнай пагрозай для нацыянальнай бяспекі. Сёння прынцыпова важна, каб барацьба з гэтым злом вялася не ў рамках перыядычных кампаній, а на сталай аснове. Пра гэта ішла размова на каардынацыйнай нарадзе па барацьбе са злачыннасцю.
Удзел у дыялогу прынялі прадстаўнікі Нараўлянскага райвыканкама, аддзелаў адукацыі, ідэалагічнай работы і па справах моладзі райвыканкама, АУС, райбальніцы, Следчага камітэта, РАНС. Старшынстваваў пракурор раёна Павел Ярмош.
- Штогод на Нараўляншчыне ўзбуджаюцца крымінальныя справы экстрэмісцкай накіраванасці. З 2020 года па цяперашні час узбуджана 7 крымінальных спраў. Некаторыя перададзеныя ў суд, па асобным вядзенне прыпынена, - адзначыў пракурор.
Адным з асноўных напрамкаў супрацьдзеяння экстрэмізму з'яўляецца прафілактыка. Павел Віктаравіч адзначыў станоўчую работу ў гэтым напрамку супрацоўнікаў АУС.
- У гэтым годзе да адміністрацыйнай адказнасці прыцягнута восем асоб, складзена 9 пратаколаў. Пасля адбыцця вінаватымі пакарання, пракуратура выклікае іх для аб'яўлення папярэджання. Калі чалавек працуе ў дзяржаўнай арганізацыі або ў арганізацыі з доляй дзяржаўнай уласнасці, мы ўносім у адрас кіраўніцтва прадпісанне аб прымяненні дысцыплінарнага ўздзеяння - звальнення. У бягучым годзе два чалавекі вызвалены ад займаемых пасад, - распавёў аб наступствах экстрэмісцкіх дзеянняў Павел Ярмош.
Падзеі апошніх дзён паказалі, што асабліва важнае правядзенне прафілактыкі ў асяроддзі моладзі. На мінулым тыдні навучэнец 9-га класа адной са школ райцэнтра адлюстраваў на дзверы туалета ўстановы адукацыі нацысцкую свастыку - сімвал забаронены ў Беларусі. Кіраўніцтва школы не пакінула гэтую сітуацыю без увагі і звярнулася да праваахоўных органаў.
- Лічу, што адміністрацыя паступіла правільна. Нельга замоўчваць такія абуральныя факты. Не скажу, што тут ёсць прабелы з ідэалагічнага боку. У першую чаргу аб такіх рэчах павінны казаць у сям'і, - выказаў меркаванне пракурор.
З прычыны недасягнення вінаватым узросту адміністрацыйнай адказнасці, пратакол быў складзены ў адносінах да яго бацькоў. А гэта, у сваю чаргу, прыводзіць да накладання штрафу ў памеры да дзесяці базавых велічынь.
У завяршэнне нарады быў вызначаны шэраг мер, якія дазваляюць значна пашырыць патэнцыял механізму супрацьдзеяння экстрэмізму, зрабіць больш эфектыўнай дзейнасць суб'ектаў прафілактыкі.