Святочныя мерапрыемствы, прысвечаныя Дню Незалежнасці Рэспублікі Беларусь прайшлі ў Нароўлі
![](https://narovlya.gov.by/images/storage/news/000902_781838.png)
На Нараўляншчыне прайшлі ўрачыстасці, прысвечаныя Дню Незалежнасці і 79-й гадавіне вызвалення Беларусі ад нямецка-фашысцкіх захопнікаў.
Пасля поўдня гараджане сабраліся на плошчы Леніна, каб прыняць удзел ва ўрачыстым шэсці і аддаць даніну павагі подзвігу сваякоў, суайчыннікаў, якія загінулі на поле бою і якія пакінулі нас пасля вайны. Настрой быў прыўзнятым. Прыбрана апранутыя нараўляне і госці, афіцэры ў параднай форме, самадзейныя артысты і дзеці ў нацыянальных касцюмах, яркія паветраныя шары — самі людзі стварылі па-сапраўднаму маляўнічую атмасферу свята.
З віншавальнай прамовай да прысутных звярнуўся старшыня райвыканкама Уладзімір Антоненка.
- Гэта свята міру, стабільнасці, павагі традыцый і адказнасці за будучыню нашай Радзімы. Яго асаблівы сэнс-дэманстрацыя адзінства нашага народа, пакуты якога выпалі на долю нашых дзядоў і прадзедаў. Той суровы час незагойнай ранай будзе ў людской памяці.
Гістарычная праўда, мір і стварэнне — вось аснова далейшага развіцця нашага грамадства. Беларусь сёння – гэта мы з вамі — людзі. Тыя, хто сваёй працай, ідэямі, імкненнямі з дня ў дзень дапамагае нашай Радзіме станавіцца лепш. Разам мы гарантыя ўпэўненай будучыні нашай краіны і Нараўляншчыны, — адзначыў кіраўнік раёна.
Запамінальным момантам урачыстасці стала тэатралізаванае прадстаўленне работнікаў аддзела ідэалагічнай работы, культуры і па справах моладзі «Маршруты памяці зямной».
Працягнуў святочную праграму флэшмоб «Беларусь — гэта мы», удзел у якім прынялі школьнікі. Музычны, танцавальны і тэатралізаваны матэрыял, сабраны разам арганізатарамі, вельмі спадабаўся прысутным.
Адкрылася шэсце вынасам Дзяржаўнага сцяга Рэспублікі Беларусь. У святочнай калоне, упрыгожанай яркімі кампазіцыямі, - кіраўніцтва раёна, прадстаўнікі сілавых структур, працоўныя калектывы, члены грамадскіх аб'яднанняў, моладзь і іншыя.
У парку культуры і адпачынку, куды прыбылі ўдзельнікі шэсця, ля помніка загінулым воінам і мірным жыхарам адбыўся традыцыйны мітынг-рэквіем.
Аб значнасці галоўнага свята беларускай дзяржаўнасці, аб яго цеснай сувязі з найважнейшай падзеяй айчыннай гісторыі — вызваленнем краіны ад нямецкіх акупантаў гаварыла ў сваім выступленні старшыня раённага Савета дэпутатаў Ала Навуменка.
Светлую памяць загінуўшых ушанавалі хвілінай маўчання, а да падножжа помніка ўсклалі кветкі.
Прадоўжылася мерапрыемства на набярэжнай Прыпяці, дзе былі падрыхтаваны розныя культурна-забаўляльныя праграмы, інтэрактыўныя пляцоўкі тэматычнай накіраванасці «Маёй Нараўляншчыне прысвячаецца», «Нараўляншчына рамесная» і іншыя. Праводзіліся акцыі, майстар-класы, выставы-продажы. Было шматлюдна і каля выставы спецтэхнікі Мазырскага пагранічнага атрада.
На плошчы адбыўся святочны канцэрт з удзелам пераможцаў раённага агляду-конкурсу «Гэта наша зямля, гэта мы — беларусы». Яркія музычныя нумары ў выкананні прадстаўнікоў працоўных калектываў парадавалі слухачоў цеплынёй і шчырасцю выканання. Доказам гэтаму былі бурныя апладысменты ўдзячных гледачоў.
Для ўдзельнікаў масавага гуляння працуюць атракцыёны, гандлёвыя рады з разнастайнай прадукцыяй.
Працягнуліся гулянні да самага вечара. Нараўляне разам з тысячамі беларусаў праспявалі галоўную песню суверэннай Беларусі – нацыянальны гімн. Фінальным акордам усіх мерапрыемстваў стаў святочны феерверк, які азарыў яркімі ўзорамі неба над горадам.