Цырымонія ўшаноўвання маладых спецыялістаў прайшла ў Нараўлянскай ЦРБ
![](https://narovlya.gov.by/images/storage/news/000902_987115.jpg)
Сёлета райбальніца папоўнілася васьмю маладымі кадрамі, сярод якіх урач-неўролаг.
Прывітаў маладых медработнікаў галоўны ўрач установы аховы здароўя Іван Афанасенкаў.
— Ваша задача поўнасцю аддавацца рабоце, праяўляючы галоўныя якасці медработніка: міласэрнасць і клопат, ставячы інтарэсы пацыента вышэй за ўсё. А ўсю неабходную дапамогу мы акажам і пастараемся, каб вы добра ўладкаваліся і засталіся ў нашым раёне, — звярнуўся да спецыялістаў Іван Генадзевіч.
Ён зазначыў, што ўсе маладыя спецыялісты дружна ўключыліся ў працэс. За кожным з іх замацаваны настаўнік, які дапамагае і курыруе іх працу. Усе, хто мае патрэбу ў жыллі, будуць ім забяспечаны ў бліжэйшы час.
Меркаваннем аб першых працоўных днях у паліклініцы падзялілася ўрач-неўролаг Юлія Андрэйкавец:
— У калектыве мяне прынялі добра. З кімсьці з калегаў я ўжо паспела пазнаёміцца, з кімсьці — яшчэ не. Але гэта справа часу. Жыллём мяне забяспечылі, гэта добрая «аднапакаёўка» у новабудоўлі. Ад пацыентаў я часта чую, што ў Нароўлі бракавала неўролага. Спадзяюся, што мая праца будзе прадуктыўнай.
Павіншаваць новаспечаныя кадры прыйшоў старшыня Нараўлянскага райвыканкама Уладзімір Антоненка. Уручаючы медыкам пасведчанні маладога спецыяліста, ён адзначыў важнасць і высакароднасць выбранай імі прафесіі, пажадаў не спыняцца на дасягнутым, развівацца і працаваць на карысць насельніцтва.
Са шчырымі пажаданнямі да маладых кадраў звярнуліся пракурор Нараўлянскага раёна Павел Ярмош і старшыня раённага аб'яднання арганізацый прафсаюзаў Алена Касуха.
Прыемным бонусам сустрэчы сталі сімвалічныя падарункі ад прафкама ЦРБ. Напрыканцы мерапрыемства маладыя медыкі і ганаровыя госці зрабілі фота на памяць.