Навіны вобласці

"Металург" разграміў "Брэст" і павёў у фінальнай серыі Кубка Прэзідэнта

У сераду ў Жлобіне стартавала фінальная серыя плэй-оф беларускай хакейнай экстралігі паміж "Металургам" і "Брэстам", паведамляе карэспандэнт БЕЛТА.

Шлях да вочнай бітвы за галоўны трафей у беларускім хакеі ў каманд атрымаўся розным. Дзеючыя чэмпіёны краіны за бягучы плэй-оф прайгралі толькі два матчы з дзесяці. У першым раўндзе жлобінцы перамаглі мінскае "Юнацтва" (4:1), а ў паўфінале таксама ў пяці гульнях прайшлі суседзі з "Гомеля". Брастаўчане ўжо на стадыі чвэрцьфіналу былі за адзін крок ад вылету: па ходзе серыі з "Віцебскам" "зубры" ўступалі 2:3, але два апошнія матчы пакінулі за сабой. У наступным раўндзе паўднёўцы стварылі яшчэ больш гучную сенсацыю, выбіўшы пераможцу рэгулярнага чэмпіянату "Шахцёра" (4:2).

Аўтарам першай шайбы фіналу-2024 стаў форвард "Металурга" Аляксандр Падкарытаў, які адкрыў лік на шостай хвіліне стартавай трэці. На адказ гасцям спатрэбілася ўсяго 50 секунд: лічбы на табло зраўнаваў Канстанцін Татарэнка. Даказваць статус фаварыта гаспадары пачалі ў другім перыядзе: спачатку большасць рэалізаваў Канстанцін Лукін, затым адзін за адным у чужыя вароты трапілі Міхаіл Стэфановіч і Ягор Старкоў - 4:1. У заключным гульнявым адрэзку "стальныя ваўкі" давялі лік да разгромнага намаганнямі Сяргея Кузняцова і Віталя Пінчука. Такім чынам, 6:1 - "Металург" захоплівае ранняе лідарства ў серыі да чатырох перамог. Наступны паядынак пройдзе ў Жлобіне 12 красавіка.-0-

БЕЛТА - Навiны Беларусi